గమనిక: ఈ ప్రసంగం వాక్యాన్ని బోధించడానికి ఒక ఆలోచన మాత్రమే, దీనిని పూర్తి ప్రసంగంగా భావించకండి. దేవుడు మిమ్మల్ని నడిపించిన రీతిలో, ఈ సందేశాన్ని మీకు వీలైన విధంగా మెరుగుపరచుకొని, దేవుని వాక్య సత్యాన్ని నమ్మకంతో బోధించడానికి సిద్ధపడండి.
వాక్యభాగం: మత్తయి 2:2
"యూదుల రాజుగా పుట్టినవాడెక్కడున్నాడు? తూర్పుదిక్కున మేము ఆయన నక్షత్రము చూచి, ఆయనను పూజింప వచ్చితిమి."
పరిచయం
యేసు క్రీస్తు జననం చరిత్ర సంఘటనలలోనే అపూర్వమైనది. ఇది మానవరక్షణ కోసం దేవుని ప్రణాళికను వెల్లడిస్తుంది. అయితే, ఈ సంఘటనలో తూర్పు దేశపు జ్ఞానులు క్రీస్తు జన్మస్థలాన్ని తెలుసుకొని, ఆయనను ఆరాధించడానికి సుదూర ప్రయాణం చేసి, హేరోదు రాజును అడిగిన ప్రశ్న అందరినీ భయపెట్టింది. మరి ఆ జ్ఞానులు అడిగిన ప్రశ్నలో అంత ప్రమాదమూ, పరమార్థమూ ఏముంది? ఈ సందేశంలో తెలుసుకుందాం!
జ్ఞానులు అడిగిన ప్రశ్న: “యూదుల రాజుగా పుట్టినవాడెక్కడనున్నాడు” - (మత్తయి 2:2)
ప్రసంగం
1. ఈ ప్రశ్న కలవరపరిచేది
"యూదుల రాజుగా పుట్టినవాడెక్కడనున్నాడు? " (మత్తయి 2:2)
- ఒక్క ప్రశ్నతో రాజు, రాజ్యం మొత్తం కంగుతింది. హేరోదు రాజు ఈ ప్రశ్నను తన రాజ్యానికి ముప్పుగా భావించాడు. ఇది ఆయనను అపోహలకూ, భయానికీ, ఆగ్రహానికీ, హింసకూ దారితీసింది.
- రాజు మాత్రమే కాకుండా యెరూషలేము మొత్తం కలత చెందింది. ఎందుకంటే, క్రీస్తు జననం వారి జీవితాల్లో మార్పులు తీసుకురానుంది.
- ఈ ప్రశ్న కలవరానికి దారితీసింది ఎందుకంటే అది నిజమైన రాజు గురించి అవగాహనను తెచ్చింది.
➤ మన జీవితాల్లో సత్యాన్ని గ్రహించి, క్రీస్తును రాజుగా అంగీకరించాలి. కలవరం చెంది తప్పులు చేయకూడదు.
2. ఈ ప్రశ్న కష్టాన్ని తెలియజేసేది
"తూర్పుదిక్కున మేము ఆయన నక్షత్రం చూచి..." (మత్తయి 2:2)
- నక్షత్రాన్ని అనుసరించారంటే ఖగోళ శాస్త్రం తెలిసినవాళ్లు అయ్యుంటారు. లేఖనాలను, ప్రవచనాలను చాలా ఎక్కువగా పరిశీలించి ఉంటారు (సంఖ్యా 24:17).
- జ్ఞానులకు ఇది సులభమైన ప్రయాణం కాదు. అనేక మైళ్ల దూరంతో పాటు, అనేక అపాయకరమైన మార్గాల గుండా ప్రయాణించి ఉంటారు. ఈ సుదీర్ఘ ప్రయాణంలో వారు తమ ఆరోగ్యం, భద్రతను ప్రమాదంలో పెట్టుకుని ప్రయాణించారు.
- అన్యులైనప్పటికీ రాజులకు రాజైన క్రీస్తును ఆరాధించడానికి ఎంతటి కష్టాన్నైనా సహించారు. అసౌకర్యమైన వాతావరణం, దొంగల ముప్పు, అస్పష్టమైన గమ్యం లాంటి అడ్డంకులను దాటి క్రీస్తును చేరుకున్నారు.
3. ఈ ప్రశ్న కారణార్థమైనది
"ఆయనను పూజింప వచ్చితిమి..." - (మత్తయి 2:2)
- నిజమైన రాజును, మనసారా పూజించాలి అనే కారణంతో వచ్చారు. నిజమైన రాజు కోసం శోధించారు (కీర్తన 29:2).
- వారు ఎవరిని పూజించాలి అనే ఉద్దేశాన్ని చాలా స్పష్టంగా తెలుసుకున్నారు: అది రాజైన క్రీస్తును మాత్రమే.
- వారి కానుకలు కూడా విలువైనవి అలాగే అర్థవంతమైనవి. దూర ప్రయాణమైన కూడా ఉన్నతమైన కానుకలను జాగ్రత్తగా తెచ్చి తమ రాజుకు అర్పించారు (మత్తయి 2:11).
4. ఈ ప్రశ్న కనువిప్పు కలిగించేది
కాబట్టి రాజు ప్రధాన యాజకులను ప్రజలలోనుండు శాస్త్రులను అందరిని సమ కూర్చి - (మత్తయి 2:4)
- ఇది ప్రధాన యాజకులను, శాస్త్రులను మేల్కొలిపింది. కొంతవరకైనా క్రీస్తు జననం గురించి వారికి జ్ఞాపకం కలిగించింది.
- కానీ వారికి కేవలం గ్రంథ జ్ఞానం మాత్రమే ఉంది కానీ వారికి నిజమైన రాజును ఆరాధించాలనే కోరిక కలిగి క్రీస్తును వెతికనట్టు మనకు బైబిల్లో సమాచారం లేదు (యాకోబు 1:22).
- బహుశా క్రీస్తు గురించి తెలిసినప్పటికీ, హేరోదుకు భయపడో లేదా వారికీ అశక్తిలేకనో దేవుని దగ్గరకు రాలేదు.
ముగింపు
- జ్ఞానులు ఈరోజు నిన్ను నన్ను అడుగుతున్నారు: యూదుల రాజుగా పుట్టిన క్రీస్తు నీ క్రిస్మస్ లో ఎక్కడ? క్రిస్మస్ క్రీస్తును ఆరాధించడానికా లేకా నీ, నా ఆడంబరాలకా? సమాధానం ఇవ్వు
- మనకు జ్ఞానులలాగే యేసును మనసారా వెతికి, ఆయననుఆరాధించాలనే ఆకాంక్ష ఉందా?
- పండుగా, పాటలు, ఆటలు, ఆడంబరాలు, విందులు అన్నీ బాగానే ఉన్నాయి కానీ క్రిస్మస్ రాజైన క్రీస్తు ఎక్కడ? ఎక్కడ? ఎక్కడ?
